投資, 投機, 與投運

每一次講起"投資" 與 "投機"呢兩個名詞, 我都覺得作得出呢兩個名的人真係好厲害, 用字準繩, 但同時, 我卻認為好多散戶, 都因為呢兩個名詞的興起以至混淆兩件完全唔同的事, 使得自己都唔知自己做緊嘅係乜. 有如此情況, 真係要多謝電視、報紙、雜誌, 做乜都係 "投資", 個個人都係 "投資者", 久而久之, 所有散戶蛋散都比佢抬高晒, 做"投資"的事時, 完全無晒理智.... 最後, 一定係蝕錢收場, 最慘的係, 蝕完一次又一次都唔知點解.


要知道"投資" 與 "投機"的解釋, 有好多書本都已經提及 (Benjamin Graham 的intelligent investor已經好詳細地解釋) , 又已經有好多blogger (好似 "ckm001", "脫苦海"....) 都有講過, 但我想喺呢度用自己的文字做紀錄. 然而, 我想在此加多另一個新名詞, 叫做 "投運" (我作的英文 ~ specfate ~ 字典無呢個字, 如果日後有人用, 出處一定係嚟自有錢人嫁喇, 哈哈) (specfate解釋: 來自兩個字~ speculate 及fate, 即是投機於運氣、命運)


以下是有錢人對投資, 投機, 與投運的見解:

"投資": 一定要經過研究及計算, 知道自己要付出多少, 預期收入多少, 當中利潤又有多少, 有何風險, 是一樣科學及生活經驗的行為決定. 投資的回報有可能是 "股息"、"租金"、"利息". 甚或是價格上的差異. 而當中, "投資"是有投入, 過程有生產的.

"投機": 都一樣要經過研究及計算, 從觀察及經驗發現的"機會"、"趨勢"中, 賺取 "差價", 低買高賣, 過程沒有生產. 投機者好清楚自己買的東西是甚麼, 亦都明白風險有好多, 如果預期 "差價"不出現會點樣. 所以, 大部分 "投機者"都可以謂之專業人士.

"投運": 進行 "投運"的人, 通常唔會自己做功課, 一係就只睇人地嘅研究, 當作係自己的研究及計算, 一係就只係聽電視、報紙、雜誌的"專家"所言. "希望"自己所買入的項目會升價賺錢. 又或者功課研究做得不足, 之後見價升就怕, 所以跟買.


投資, 投機, 與投運的差別:
根據有錢人的觀察及理解, 運用80/20定理去分類上述3類人:

人數:

在所有人當中:

大部份時間在"投資"及"投機"佔20%; 大部份時間在"投運"佔所有人中的80%;  

在大部份時間在 "投資 "或"投機" 的人當中:

大部份時間在"投資"的人佔80%; 大部份時間在"投機"的人佔20%;

回報:

大部份時間在"投資"的人當中 (相反亦然) :

"投資"回報佔80%;"投機"回報佔20%;

大部份時間在"投運"的人當中:
80% 會蝕錢收場, 20%會有錢賺住走;

 然而, 有80%的 "投運"人士不知道自己在"投運",還以為自己是在"投資" or "投機" (多謝傳媒係唔係都話投資 / 投資者咁囉)

從以上推論,
1) 如果你想做賺錢的20%, 就一定要做足夠的功課. 否則, 就是 "投運", 蝕錢不要怨其他了, 是自己笨蛋白痴憨居低能弱智懵丙;

2) "投資" 及 "投機"是一個中性的名詞, 代表有做功課的人在自己行為中賺錢而已;

3) "投機" 一般比 "投資"困難, 所以大部份肯做功課的人都會進行 "投資" 多於 "投機"; (但要知道 "較困難"唔代表回報較高, 賺得多與少, 係睇研究分析的功力, 唔係做邊樣)

如何知道你正在進行投資, 投機, 與投運?

其實, 我地要避免的, 不是投資同投機, 而只係"投運" (雖然, 有好多人都覺得"投機"是不好的,但有錢人不太認同)

嘗試問自己以下問題, 就知你係咪喺度"投運":

基本問題:
1) 知唔知預期支出幾多?
2) 預期收入幾多?
3) 預期利潤是多少?回報率為幾多?
4) 有甚麼風險?

如果你在買股票, 請追問自己:
1) 呢間公司做乜生意? 每年生意額多少? 利潤多少? 市場如何?
2) 呢間公司邊個做老闆? 人品如何?
3) 呢間將會面對甚麼機會? 風險?
4) 那些機會/ 風險 對你的資金有乜影響? 影響程度如何? 點樣影響?
(當然要分析一間公司, 幾本書都講唔晒, 但要知道自己係唔係"投運", 問以上問題就可以分辨)

如果你可以答得越詳細, 你在進行"投運"的機會就大大減少了.

要知道自己做緊乜嘢, 點解咁做, 就係進步的基本步.