起步 前傳 (三)

話說當時我手頭只有10萬唔夠, 眼見樓市開始不斷升溫, 自己又開始要諗住成家立室, 可以點算?


當時2006年, 我研究當時香港唔同地區的樓價, 睇得到自己根本買唔起香港市區樓, 就連沙田, 荃灣都買唔起, 因為動輒都要成140-150萬 (對比依家2010年動輒要成200萬就緊係平啦). 記住, 我當時只擁有區區幾皮嘢咋...知道自己只係有能力買細價樓及細單位.

但係, 人係要自己面對問題, 解決問題, 而唔係等人地/ 等個天來救我. 所以我再走入啲, 搵得多啲,連新界樓/ 舊樓都睇埋, 連村屋都研究埋.

我問銀行, 自己有無可能做得多啲成數的樓按;


銀行回覆: "你依家咁年青 (廿幾歲), 如果你搵一啲唔太舊嘅樓 (唔好係村屋喎), 做九成半按係無問題的."

之後, 我又自己計數, 睇下自己可以承擔幾多 (一定要自己計得掂條數,唔可以靠人):

例一:
200萬樓: (港島/ 市區)
5%首期: 10萬, 經紀佣金2萬, 律師費加厘印加雜費約1萬 ~~~ 剛剛13萬
25年計劃要月供: (當時p rate係差唔多7%, 銀行比我p-3.x) $10,xxx
30年計劃要月供: (當時p rate係差唔多7%, 銀行比我p-3.x) $9,xxx
水電煤差餉管理雜費一個月平均 $1500
(out budget, 唔洗諗)


例二:

150萬樓: (近市區)
5%首期: 7.5萬, 經紀佣金1.5 萬, 律師費加厘印加雜費約1萬 ~~~ 剛剛10萬
25年計劃要月供: (當時p rate係差唔多7%, 銀行比我p-3.x) $7xxx

30年計劃要月供: (當時p rate係差唔多7%, 銀行比我p-3.x) $6xxx
水電煤差餉管理雜費 一個月平均 $1500(within budget, 但每個月供得都幾緊)

例三:

100萬樓: (新界 ~元朗/屯門/上水/粉嶺)(大埔沙田都唔洗諗)
5%首期: 5萬, 經紀佣金1 萬, 律師費加厘印加雜費約1萬 ~~~ 剛剛7萬 (仲有少少錢買傢私)
25年計劃要月供: (當時p rate係差唔多7%, 銀行比我p-3.x) $5xxx

30年計劃要月供: (當時p rate係差唔多7%, 銀行比我p-3.x) $4xxx
水電煤差餉管理雜費 一個月平均 $1500(within budget, 每個月都供得幾舒服)

我明白, 自己能力去到邊, 所以積極搵100萬至150萬的新界樓 (我有好多朋友都不願意這樣做); 幾經努力之下, 我終於搵到一間合適的樓,可知道, 我在agent面前簽名買樓時, 真係手都震震地, 我又驚做唔到樓按 (我之前借過唔同嘅loan, 個file真係花花地...), 又驚自己比人炒, 無錢供樓....


不過, 機會只會"送"比有準備的人; 我終於開始自己的"業主生涯";而且:

1. 我買樓之後大約一年 (2007), 美國/ 香港開始減息, 我每個月的供款大大減少了;
2. 我無比人炒魷, 雖然2008金融海嘯影響公司好大, 但公司都係減我人工同雙糧, 起碼未裁走我;
3. 因為之前幾年要還錢的地獄訓練", 我已經習慣節儉同埋計畫消費, 所以我可以輕鬆地省吃儉用;
4. 買樓之後, 樓價慢慢上升, "心理上"我富裕了; (其實, 就算樓價跌,我也無所謂, 因為只要我有份工, 個個月有人工, 我就供得起層樓繼續有得住).....