投資股市的計畫 ~ 每個月3000變650萬投資計畫

之前講過自己投資樓市的30年計劃, 現在, 我又要講講投資股市的計劃了.


巴菲特有一句關於投資的名言, 投資有兩個要點
第一: 不要虧本;
第二: 堅守第一信條;

呢句說話看似好廢, 但我又十分相信, 十個人入面有五個人係做唔到, 甚至, 有好多人做唔到都唔知. 否則, 世界上就唔會只有一個巴菲特啦.

回說我呢個計劃, 其實做法好簡單, 就係成日都有人講的 "平均投資法", 做一個定時定額投資股票.

假設我現在30歲, 每個月投資$3000, 只要我找一隻平均年回報率 (連股息) 有10%的股票, 在未來30年不間斷, 每個月都投資$3000, 同時將每次收到的股息再投資, 30年後, 我的總投資額是108萬, 但我的股票價值就會達到650萬.



呢個計數方法好簡單, 用Excel都可以計算得出. 所以我無諗住喺度記錄了.

要完成呢個計劃, 有幾個必要條件:

1. 恆心: 無錯, 係恆心, 做乜都好, 恆心係最緊要的, 同 "投資樓市"一樣, 因為唔係一日半日的事, 好多人都會半途而廢 (希望我唔會吧);

2. 勤力: 其實, 要做到平均每年10%回報真係唔難。 我相信, 就算我求其點幾個number (只要係藍籌或工業股), 應該超過一半在過往10年都做到10%以上回報,而四分一只做到5%, 淨返最後四分一係只有2%-3%, 甚至蝕的; 如果勤力一點, 做多點功課 (看"投資股市",點樣做功課), 經常注意自己投資的公司的年報/ 半年報/ 季度報/ 新聞/ 有關的市場新聞, 對比現實回報同自己的回報展望是否一致, 不一致又是甚麼原因, 適時放棄已 "壞死" 的股票, 相信10%-15% ~ 無難度!

3. 戒貪用忍: 應該都有唔止一位"高手"提出過呢點, 呢樣習慣係要達成目標的必要條件, 尤記得我早幾年買"股仔", 在一個月內賺左超過一倍, 我貪心, 貪快, 借錢再加碼, 點知一個屈尾十, 將之前賺到的都賠了, 還蝕埋本金50%。如果我當時唔係太貪心, 相信我依家達標指數會高好多, 事實証明, 貪心係進步原動力, 但"太貪心"/ 貪快, 就只會越行越慢;

4. 越早做, 越著數: 投資股市同投資樓市有一個最唔同的地方, 就係唔洗你比出"第一桶金",入場費平, 做月供股票, $1000一個月都有得玩. 又計一條簡單數學:
如果我20歲開始每個月投資$1000, 就當我年少無知, 年回報只做到5%, 到我30歲, 我的資本已經達到18萬, 而往後日子跟返我上述做法, 每個月$3000, 年回報10%, 到我60歲就會變成870萬。
嘩!!!足足比我30歲先開始多左三分一, 但我只不過係每個月儲$1000,而且年回報只係可憐的5% (我肯定, 超過95%藍籌股都必定做到呢個回報率)

對, 這就是複利的力量!!

5. 唔好買儲蓄保險/ 保證基金: 正所謂 "斷人衣食尤如殺人父母", 我唔想打爛做保險的朋友飯碗, 但我必須要記錄自己的經驗, 所以只可以講一聲"對唔住"

跟據個人對 "儲蓄保險/ 保證基金"的認知, 一般呢啲plan都會有一個保證回報比客戶 (4%-6%) 不等, 但是:

"儲蓄保險" 一般會在客戶參加之後第三年, 甚至之後先可以開始有返第一年的"保証回報"可以比客戶拎返, 雖然個plan會有個保障比客戶,但只得10萬8萬的人壽保障(死左先有得拎嗰種),算了吧,

讓我又喺度計計數做做比較:

一個"儲蓄保險"plan, 如果每個月供$1000,大約會有10萬人壽保額, 假計個plan在3年後先開始有第一年的"回報", 即係已經供左$36000, 才開始有$480回報. 即係3年的平均回報只有1.33%, 另外, 個plan一般會假設客戶不會"提走"保証回報"(有些公司叫紅利/保証紅利),先可以做到4%年回報...即係保險公司先食左你兩年供款, 然後"好大方"咁保證你每年4%複利增長囉。

咁即係點? ~~~ 咁即係不如好似我上述所講: 每個月拎$1000,然後是但月供一隻藍籌股票, 將所有收到的股息又放埋入去隻股票再投資, 起碼, 我要拎返啲錢, 都只係賣左啲股票就攪掂; 相反, "儲蓄保險"的話, 又要簽名confirm拎錢, 又要等佢寄票比我....都係嗰句, 算了吧 ~ not my cup of tea
(保證基金都是類似的運作)