繼續強積金 ~~~~ 後生要搏? 老來保守? (2)

上回 (繼續強積金 ~~~~ 後生要搏? 老來保守? (1)) 提到 ~ 強積金要平衡, 是要管理的, 以有錢人有限的能力, 歸納出以下的操作方法, 個人認為算是較平衡但又較容易的操作:

(其實呢個操作槪念只是把股票投資/ 盈富基金投資的概念拿來用而已, 根本就如出一轍)

1.      為方便處理, 把所有未來的供款都投放到現金部份 (好似叫強積金保守基金之類吧)

2.      把所有MPF戶口的資產加埋分三分 (就叫A/B/C) [ 例如比例是4/4/2]

3.      A放在自己認為 “高回報/ 高風險” 的基金, 可以是股票基金, 也可以是指數基金. 而A也可以分幾部份放在不同的基金

4.      由於MPF各種基金一般每年的上落 (除了2008年)唔會好似個別股票咁, 上落幾十%, (但10%-20% 的高低波幅是經常有的) 所以, 如果基金一年內跌超過15%, 可以一半B來加碼. 如此類推. 相反亦然

5.      咁C有乜用? 有兩個作用: 1.當你覺得好有信心某一基金在未來一段時間會”向上衝”, 你可以用一半C放落去, 搏一搏無頻撲. 2. 作為全世界都死的時間, 你仲有最後一口氣 “執死雞” ~~~ 通常呢個時間會點樣出現? 就係當全世界的評論接近一面倒話到世界末日咁滯, 仲有一啖氣仲有能力買嘢 “等”的, 就是羸家. 只是, 你我他都唔會知幾時係呢個時間, 所以點都好, 都要留返一半C等呢個時候出現. 但不要以為呢個時候出現, 你會好好過, 因為通常咁嘅時候用到C, 係大家的A/B 都已經輸到流血不止了…. 就好似08年尾/09年頭金融風暴的時候

以上操作, 可以每個月做一次, 可以半個月做一次, 也可以日日計一次, 反正好多時計劃內之基金轉換無限次都唔使錢 (要睇返個別MPF PLAN, 唔排除有D可能會收錢轉基金).

咁樣操作, 唔會令MPF戶口由1變10, 更加比起 “回報最大化” 會少左一截, 但所謂的回報最大化只是子虛烏有的幻想, 我都係寧願笨七點, 安穩地慳返D驚風散好過.

事後孔明地計算, 如果以過去10零年的基金價格作計算, 大約是接近8%的平均回報吧. 都係嗰句, 如果有錢人及有錢太太乖乖地工作, 供款, 5%的平均回報, 在廿年後我倆MPF 戶口, 都有600多萬資產了, 如果有8%就已經過千萬了 (好有可能係我地最大筆的資產啊)

[一千萬資產絕對不算多, 有很多網友擁有不知幾多倍呢個數添, 但這就是有錢人對退休生活的”需求” ~ 所以我會努力的]