收息股的選擇

在股票投資路上, 每個人都有自己的領域, 有些人玩短炒好叻, 大上大落殺出殺入面不改容, 有些人膽大心細精於研究, 經常找到不同的好股新股絕世靚股, 最緊要每個人都要知道自己精於那一個套路, 唔好想著自己總可以飯飯都食得到, 更唔好妄想自己獲獲都贏, 有贏有輸係好正常, 聯賽冠軍球會都唔係全年贏晒, 每隊波都有高低潮, 球隊入面嘅球員都有可以因為各種原因唔可以出賽, 打聯賽最重要目標, 係球隊最後拎冠軍, 但對於我地普通人投資呢, 就唔洗做最高回報嗰個, 做到訂立嘅回報目標, 就已經算拎冠軍。

對於選股呢, 有錢人就唔係咩叻人, 尤其對於出出入入, 咩價位出咩價位入呢D高級技巧, 我就更加係地獄黑仔王, 都真係唔知點解次次都錯, QQ都衰, 就講最近, 有錢見IT 股個勢唔錯, 無錢買#700正股都買少少遠價牛仔支持下, 唔買由自可, 一買幣傢伙, 連15%+ 遠價嘅#700牛都可以比我即時燈死左, 都真係唔好講笑, 真係連大市都比我燈死左..... 劉華講過 "如果你喺賭場搵明燈, 搵極都搵唔到呢, 其實你就係嗰盞明燈"... 呢個心情, 我真係好明,嗚嗚..... 所以無乜野嘅話, 我都係返入房溫書先喇.... 得閒先出嚟玩返兩手了

由於有錢人自知短炒真心唔叻, HI 多過 LIKE, 所以只好用返D最原始嘅方法去買股票, 就係搵收息股, 自建"收息股ETF":

材料基本都係嗰D, 穩定派息, 息率唔低, 生意穩定, 有增長, 現金流安全, 老細正正常常.... 其實, 如果用STOCK FILTER一下, 發現依家香港股市, 都剩低唔多股票可以入圍, 所以, 大部份錢都可以繼續擺下先. 時機嘅野, 一年總有一兩次大跌市, 咁到時咪入下囉, 其他時間, 都可以在入圍佳麗之中, 慢慢揀D好野, 續少續少地入貨, 當月供又好, 儲貨收息都好, 咁起碼, KEEP 住打大個倉, 又有息收下