做個有錢人(二)

上文提到: 我要計劃為日後"做個有錢人"而努力, 而目標係平均每個月的被動收入為$25,000.
要做到有關目標,我大約要在50歲前得到1千萬會"生產"的資產(我會叫佢地做我的"金鵝")。


我自問唔係一個好彩嘅人,絕無可能中六合彩頭獎獨得幾多千萬;我更唔係有錢人的仔女,我父母絕不會有幾千萬身家留比我,我可以做到的,就係靠自己努力一步 步致富.

當我依家由零開始, 要在20年入面由零開始得到一千萬金鵝,我的計劃又如何呢?

為左達到目標,我要做一啲簡單計算,睇睇我要每個月儲蓄多少才可以做到:

1) 回報率: 每年5%(啲儲蓄保險一般包你每年4%,我應該點都比呢啲plan叻少少掛);

2) 年期:20年;

3) 回報結果: $10,000,000;

根據上述假設, 我要每個月儲蓄大約$24,000。(我用excel的function: "PPMT"計算)。

嘩, 一個月儲蓄$24,000?! 我係一個普通打工仔咋喎.... 一計之下, 發現儲蓄率要超過100%; 目標遠了...

唔怕, 睇返我最近幾年的投資經驗 (我由2005開始投資股市),雖然我成日都計錯數,又試過因為貪心買大左輸大左,更試過因為無錢洗而迫住要平賣自己手上的好股票,早兩年仲遇到"金融海嘯";但節合計算,平均每年都做到有8%回報率. (我之後會有另文寫自己的投資股市經驗)。

如果以呢個回報率做20年,每個月都係$16,800左右就OK喇 (相差一半啊)。

每個月儲$16,800係咪好難? 如果對於一個初出矛爐的後生仔來講,真係唔易(我初出來做嘢都係得萬零蚊人工之嘛); 但係,我相信對於一個已經努力工作左十年八載的人,而且已經結左婚,公一份婆一份的家庭來講,絕對唔係問題。

為左方便檢視自己"做個有錢人"之路,我會不斷更新自己的金鵝總值。

要"做個有錢人"唔難,難就難在你想唔想"做個有錢人"!