準備做個有錢人 - 閱讀的重要

錢唔係萬能, 但無錢就萬萬不能。雖然我唔知邊個作呢句說話,但我就深深體會過了...


講到"做個有錢人",人人都會諗搵錢。其實,搵錢只不過係一個結果,唔係最重要,我覺得,"做個有錢人"的意義,在於可以自由自在做自己喜歡的事情。所以嚴格來講,我係想"做個幸福的人",但如果咁講又唔夠明確,所以我拎左當中必不可缺的一樣東西~~ "錢"作為第一目標。但我心中絕對明白,"搵錢"係令我"幸福"的一個過程同工具。

講返搵錢, 有好多老一輩香港人會話,努力讀書,入大學,出來做醫生律師會計師,或者搵份好工。無錯,有份好工可以搵到錢,但唔代表"有錢",原因好簡單:搵得多洗得更多。所以有人會講,一個人是否富有,唔係講佢搵到幾多錢,而係佢唔做嘢的話,仲可以食幾耐"穀種"。

唔講其他嘢住, 講返主題先。點解我會講 "準備" 做個有錢人 - 閱讀的重要?
呢個又係我的個人經驗。

我記得自己讀書的時候真係好懶,恃住自己有些少小聰明,努力溫書? no way! 課外讀物?有呀, 公仔書.

但隨住自己無書讀要出來做嘢開始, 我就明白咩叫做 "書到用時方恨少". 一個活生生的例子:
當年老細同我講 "喂, 做個有錢人, 你識唔識乜乜乜呀?"
我: "我識呀, 學過呀"
老細: "咁你做呢樣嘢啦"
我: "但我唔熟喎,我識識地咋喎"
老細: "唔熟?! 咁你就唔好話自己識啦!!" (即時火上心, 因為我識少少扮代表)
之後, 老細都係比左個 job我嘗試處理, 而佢就好好人咁比左一個星期我去"熟習"... 好彩,我最終都算係做到佢嘅要求

但係喺呢個星期入面, 我就真係讀書讀到死,日日都刨書...

我真正喜歡閱讀,都係因為工作。記得當時我開始要管理下屬,但那些所謂下屬根本就唔理我, 次次都要老細出面,班友仔先會聽聽話話。我心諗,如果次次都係老細出面做嘢,咁要我嚟做乜鬼?所以我"的"起心肝去開始睇一啲有關管理嘅書。

唔睇由自可,一睇幣傢伙, 書入面提及到"錯事"全部在我身上搵到...唉, 唔怪得之自己班"靚"都唔buy自己啦... 如果, 我一早就會睇多啲書, 我諗我會容易啲做到一個好上司 ~~

在職場上, 我都算係好彩, 做得幾差都好,起碼老細到依家都未炒我嘛.... 但係, 知恥近乎勇, 我越明白自己不足,就越知道要多閱讀,多學習前人的經驗。

相同道理, 若然要"做個有錢人",一定要多閱讀 ~~ 有關投資/ 做人/ 做事/ 管理/ 創業..... 機會只會留比有準備而且懂得把握的人。

為此, 我會將我讀過的好書記錄, 好讓同道之仕互相交流。