買樓計劃 2012

最近, 我經常瀏覽地產公司網頁, 睇下近期樓市有無進一步回落現象, 發現雖然樓市成交開始減少, 但係未出現大量減價出貨現象, 呢個就正正係因為之前政府的SSD政策出台, 令到炒家無嘢可做, 剩下的, 唔係有實力的老細, 就係自住人仕, 呢啲人一向都係持貨力較強的, 即係話, 就算個市跌,佢層樓無人要, 佢都唔會輕易減價出貨嗰隻囉... 咁又會點影響有錢人的買樓計劃呢??


有錢人仲未開始睇樓, 但預期想要的樓由 350萬去到 380萬不等:
首期就要比 105萬 - 120萬;
另外, 佣金律師費加印花稅就要成 15萬左右

依家有錢人雖然手頭上有兩層樓, 但現金只有60 - 70萬, 係唔夠即時買多層樓嘅.

如果我要買樓, 就有幾個方案:

(一) 穩打穩扎式: 賣左其中一層套現一球買樓, 好處係夠安全, 但係就少一層樓在手收租;

(二) 做大業主式; 同銀行傾, 用現有兩層樓加按套現幾十萬出來比首期, 三層樓一齊供, 現有兩層樓出租 ~~~ 以現時有錢人的供樓銀碼來講, 就算銀行加返 "投資樓按"的利息 (一般加息1.5%-2%不等)落我兩層樓度, 我每個月都仲有錢回到, 幫補新樓供款添;

(三) 等待黎明式; 我同有錢太太傾過, 因為成交越來越少, 我地預期樓價在未來一兩年有機會有10%左右的跌幅, 如是者... 350變320, 380就變350, 即是首期連洗費就可以慳10幾廿萬; 不如等佢一年半載, 睇睇樓價係咪真係有得調整下, 就算無得減, 理論上都升唔起吧;

不過咁, 我依家都未睇樓, 所以呢三個方案都未係真正的選擇