有錢人上年賣了樓, 依家現金存款加埋股票同期權戶口的資金, 加加埋埋可動用到接近$220萬資金, 如果全數買晒 盈富基金 (2800), 可以買到10萬股, 如果以2012年來講, 全年每股派 $0.68, 即是一年現金股息 $68,000; 但如果有乜風吹草動, 打仗溫疫, 股價暴跌幾成, 就算我唔等錢洗, 都心中有鬼, 死望爛望佢返家鄉.
"錢多的人可以投機, 錢少的人不可投機"~~ 有錢人自問正正就企左喺中間, 錢唔算多, 但要由零開始搵返咁上下數, 又真係有啲難度, 所以, 最好的做法一定係處理好現金水平的比例, 做到進可攻, 退可守, 大跌可入貨, 蝕晒無生活經濟問題.
其實,我們大家都唔係先知, 唔可以睇得透個市未來點樣, 大家都係研究研究, 煙酒煙酒, 多多少少的股票專家, 都係似是而非咁吹下水, 好似啲馬評家咁講, "嘩, 呢隻馬屁股有白點, 跳步好輕型, 好有鬥心...." 信者得夠. 我自己就從來都唔識賽馬, 也沒心機研究. 只識得篤手指選號碼睇馬名, 然後下注, 結果就緊係贏.....到份開心囉.
但係, 講到真金白銀要賺錢嘅項目嘞喎, 就一定係保本為上, 增值為次, 大賺再次之, 所以, 我會幫自己做 "風險管理". 當然, 每個人對現金水平的要求都不同, 而我的底線是: 現金夠我食谷種半年, 假設我每個月的家庭現金支出(供樓+養屋企+個人洗費)是 $3萬, 那半年的現金需求就是 $18萬, 即是我要有$18萬點都唔可以用, 又或者說, 要在半天之內可以拎到出來的$18萬 (比多少少BUFFER).
根據上述講法, 我就有 $200萬可以作投資/ 投機之用. 現在我只動用了 約50%資金, 還有50%資金在突然跌市時再出撃/ 加碼之用, 對我來說"感覺良好". 始終暫時個市又未到好瘋狂, 又未到好絕望, 在兩個極端都未出現之前, 有錢人只會慢慢一面儲貨, 一面儲錢, 等待機會.
關於我
.JPG)
我的網誌清單
-
-
-
-
-
回應網友5 個月前
-
-
-
-
-
-
有錢人你好:
回覆刪除本人一向有閱讀你的文章,真係獲益良多,這次都係弟一次發留言請教. 本人有事想請教下你,如何建議對我現在資產作出適合配置.萬分感激.
1. 流動現金: $1,155,518
2. 人民幣高息債券基金: $497547.68 (原本開倉價係50萬,扣左手續費8500,三月開倉的, 每年4次息,一年可能有4厘回報)
3. 股票: $189,635 (主要係工商and 太保)
4. 香港政府bonds: $31526
5. (本人己有買保險)
本人三十歲,每月可儲20000左右,無負債,想係2015年結婚買樓,本人希望係2013 and 2014年間儲多些錢作2015年計劃,長遠黎講,請問有錢人有何建議?我應該用依家淨現金全數做穏健收息(e.g盈富)定係用一部份作比較高風險投資好呢?
還有,到時如果按揭息率去到近3厘,應該建議借7成定9成呢?借9成的話,多左0的錢如何放置做按揭息率對沖呢?本人的"人民幣高息債券基金"是打算這樣用作將來減輕供樓的息口的.
以上情況只係用本人資產計算,無計入我的另一半. 太多問題,不好意思,萬分感激.謝謝
To 匿名, 多謝閱讀,也多謝你留言分享交流. 未知可否告知閣下高姓大名?
刪除首先,作為一位三十歲的年青人,你已擁有約$190萬的資產,而且每個月更有約$2萬的儲蓄額,個人認為已經是個很好的基礎.因為不知道你的職業/收入為何, 不知道你想要買甚麼樓 (賺兩萬五儲兩萬vs賺廿萬儲兩萬,及買新界樓vs買山頂樓), 也不知道你的支出情況,所以意見可能有點片面,唔好介意.
1. 對於買樓,本人覺得依家 (2013年)開始進入買家主導市場,但情況並不全面,我經常講: 自住樓(當消費品咁睇)基本上幾時買係無問題的,比得起錢供得起咪得囉,我朋友群中也有些近期找到荀盤,買入價比市價低一兩成都有,但要有耐心同埋 “人急你唔急”,尤其地產代理急你唔急,唔到價的話,話比代理知你budget唔到~唔買,但我唔係叫你係唔係都壓佢兩成搏搵傻仔喎,咁樣好易一拍兩散,地產代理一定唔會再理你. 但如果你想又賺住又賺價的話, 咁就有點難道了.
2. 結婚唔一定買樓,買樓亦唔洗要結婚先做,依家開始搵樓睇啦,地點啱,景觀啱,價錢啱,咁咪買囉,但要注意銀行做按揭,400萬以上樓已經有唔同安排,唔一定做到9成按. Touchwood呢兩年都無心水, 真係唔好迫自己求其”執件”, 租住唔洗死嫁, 我有朋友早幾年層樓唔夠住所以賣左樓去租樓住, 睇左幾年最近先入左層, 佢呢幾年租金都比左幾十萬,但係買到心頭好又唔係咁計.
3. 未來樓價股價乜價物價係點我唔識估亦無可能預知未來會點,只不過我可以咁講,你要買樓的話就唔好預個息率去到3厘咁少嘞,自己計下,去到5厘6厘,你現在嘅生活質素會否被影響,唔好自欺欺人,講話”最多”唔揸車唔搭的士,唔去食好嘢唔去旅行囉, 咁咪因為做好the worst situation的預備, 變左樓奴囉. 除非你一早預備, 為左層樓為左個家犧牲少少咁就唔同講法.
4. 樓按7成定9成真係好睇你想點同埋你的能力, 我有朋友都幾有米,但係佢就係鍾意“有米”的感覺, 所以買樓做9成,寧願比息都要有錢傍身,也有朋友無乜米,但就係唔鍾意欠銀行太多錢,死抓爛抓當埋底褲都要比3成首期,話驚樓價跌幾成會比銀行追差價喎,真係個個都有自己的一套想法. 如果你好有信心呢幾年裡面,每年的投資收益都可以跑贏樓按,咁老虎蟹都9成啦. (呢樣好睇你自己嘞喎)
5. “高息債券”呢家嘢, 一向都唔係有錢人杯茶, 一來我唔熟, 二來我唔相信銀行會無厘頭比高息, 當中一定有啲嘢, 槓桿、匯率風險、必買必賣合約就係其中一例, 早幾年金融海嘯時I kill you later比人媽媽聲, 就係有啲唔知死的有錢佬, 搏銀行比高息佢買股價賺錢, 點知冧市時要抬錢入貨,仲係百萬百萬千萬千萬咁抬,又唔可以cut loss,真係個底薄啲現金少啲都比佢一鑊玩謝. 至於你依家嘅基金係點,你就自己睇下嘞.
6. 之於你日後點樣搵多啲同儲多啲,以至到你嘅資產配置嘞喎,你自己都係專家,比我更清楚啦,我就真係比唔到咩經驗同你分享嘞, 但觀乎你年幾+你的資產配置及金額,你的投資回報能力比我更強啦,只係你未買樓或者係你賣左樓,所以心癢癢想買姐; 我嘅投資回報主要係啲樓好彩升得咁勁先會有得升咁多,(都係比你多啲啲咋); 我都係用巴菲特的名言互勉: 第一: 不要虧本;第二: 堅守第一信條;
意見供你參考, 祝一切順利. 歡迎你多留言, 大家多作交流.