扎鐵工人與碼頭工人

執筆之時, 葵涌貨櫃碼頭工潮還未結束, 勞資雙方在政府的"努力斡旋下", 仍只是在願意坐下來談判的地步, 至今仍沒有半點達成協議的眉目. 有錢人都有留意此新聞, 然而, 我往往在想有關此新聞的, 卻不是對對錯錯, 加薪與否的問題, 而是"供求", "價格", "價值"的問題, 而我更聯想到當年 (好似是2007年的事情吧), 地盤的扎鐵工人罷工事件.

簡單地講, 話說當年2000年科網爆破之後, 直至沙士之後, 本港地產一潭死水, 全港地盤工人都減薪, 其中, 扎鐵由一工千二蚊減到八百, 甚至六百都有, 新手更可能只有4,5百, 及至07年, 地產市道在政府用盡方法(主要以沒有土地供應)之下, 加上全球經濟回復上升軌, 人民幣升值, 物價開始上升, 然而扎鐵工的人工一直都沒有回復至$1200水平, 生活水平越見低落下, 扎鐵工人開始了罷工爭取加薪. 有關詳情可以參考以下連結:

http://zh.wikipedia.org/wiki/2007年香港紮鐵工人大罷工
http://www.inmediahk.net/node/253970
http://hk.forum.search.yahoo.com/search/forum?ei=UTF-8&rd=r1&fr=FP-tab-web-t&p=紮鐵工人+罷工
(關於當年的故事, 還有好多連結有更深入的報導及記錄)

無論誰對誰錯, 最終佢地都"成功"爭取到.......日薪由標準的$800加薪至$860, 然後過多年就$950.

現在的扎鐵工人日薪多少?? $1500 - $1700, 過多兩個月隨時更高.... 都無人做喎...
點解會有咁嘅情況? 供求關係囉. 明就明, 唔明就自己攪明白.

說慘, 每個工種都有自己的苦況, 地盤工日灑雨淋, 今次的碼頭工人長時間工作, 屎尿飯都喺個櫃入面.... 其實, 我屋企個工人都係長期24小時工作, 連自己病病地都要工作 (講落, 我都係無良僱主? 但我個工人姐姐又好喜歡幫我打工喎), 因為佢老闆我都要去工作, 佢唔做, 屋企嘢無人做. 無人煮飯, 無人湊仔. 當然, 大家工種唔同, 又可以話唔可以拉埋嚟講.  講到底, 又係你情我願, 有求有供, 有價有市的交易行為. 這是無情的, 但又最實在.

時勢嘅嘢一時一樣嫁姐, 當年扎鐵工人攪到好多人都唔鍾意佢地, 亦有不少人同情佢地, 支持佢地. 而佢地最終都係為左加薪一日幾十蚊, 點知跟手幾年澳門大興土木, 香港又有地盤開工, 近年已經係你肯扎, 我肯比的狀況, 年年有人工加, 依家仲話吸引到啲"大學生"都話要投身"扎鐵"喎, 呢啲就係時移勢易.

睇返碼頭物流貨櫃業, 面對的競爭唔係其他國家, 而係國內各個地方大大少少的碼頭, 呢啲都係可以 "直接入口"的地方, 內地甚麼港甚麼港一個一個咁起, 再配合大陸鐵路網唔知最多橫幾多縱, 無論運輸, 儲存, 以至分銷的渠道都比香港平, 你話未來對我地的貨櫃碼頭需求又係如何? 咁, 對於碼頭工人的需求又係如何? 之後, 就係嗰啲工人的 "價值"又係如何? 變相去到佢地工作的價錢又會如何? 全部一環扣一環, 但如果呢啲說話出自嚴磊輝所講, 又會比人講危言聳聽, 實際剝削. 好在有錢人只係塘邊鶴, 一介草民, 唔怕比人插, 亦都唔會有人有興趣插.

女人最怕嫁錯郎, 男人最怕入錯行....但兩樣嘢都可以係自己選擇的, 起碼, 在香港可以!!!

希望事件早日平息, 大家開開心心生活.

共勉之.