宏利達標 (入貨目標)

有錢人早一個星期 (2010/08/13)講及宏利今年第二季成績差強人意, 被人"質"到不似人形, 正是買入好時機, 話口未完, 股價第二日即時跌落有錢人目標價 ~ $100以下, 有錢人已經入了第一轉貨, 呢幾日正看著佢股價繼續跌, 雖然睇住佢個價慢慢跌, 等同於買股之後帳面即蝕, 但有錢人反而越來越開心, 因為好快又會跌到第二個目標價 ~ $90以下.


宏利依家股價 $95, $96左右, 睇嚟佢仲有得跌, 但要跌到去有錢人的 $90目標, 可能仲要多一個星期. 或者更耐....

其實, 投資賺錢可以好簡單, 差別在於你肯唔肯去做功課同埋你對自己所做的功課有無信心:

好似宏利咁, 可以在05年賺到210憶, 06年賺到260憶, 07年賺到340憶, 雖然. 08年及09年分別只賺到31憶及98憶, 而今年大有機會差過08年, 但有錢人絕對相信, 以宏利的作風, 兩年內必可翻身, 回復至每年賺250憶以上 (即平均每股賺$16左右). 原因好簡單, 我睇唔到宏利的保險業務會有乜嘢大衝擊, 今次衰嘅係投資同有關利差同估值, 唔係本業, 營運賺利能力不變, 只待時機返來, 股價隨之而起.

如果有錢人的預測無錯, 到時宏利的股價, 就算只以12倍市盈率計, 都已經$190.
即係話, 如果以$100為買入價, 兩年之內, 會有 90%回報 (未計股息); 如果佢跌得到去 $90, 即係有 110%回報. (兩年的平均復利回報超過40%) 安全地投資賺錢, 就係咁簡單.

當有錢人向朋友推介宏利時,

朋友竟然問我 : "下?! 要兩年咁耐呀? 有無快啲嘅股票呀?"

有錢人: "有隻又安全, 又高回報的股票, 只係放兩年姐, 仲想點? 唔通要一買就十成十賺幾倍咩? 如果有, 唔該通知聲, 我第一買!!"


朋友: "如果唔得又點呀?"

有錢人: " 咁我咪樣衰衰, 啲錢浪費了兩年光陰比佢囉."

朋友: "如果再跌呢?"

有錢人: " 再跌再買啦緊係. 起碼佢一定有息派先啦"