與有錢太太在賣樓前的對話

在賣出放租樓A之前.  曾經同有錢太太講起, 佢話, 不如唔好賣住, 反正依家都無盤喺市場上面, 等多陣應該會再升下添;


有錢人問太太: "咁你估呢一年有幾多升幅??"

有錢太太: "應該都有一成嫁左右"

有錢人: "小!!!! 咁賣左佢好過啦, 你老公我要做到一年搵十零廿萬有幾難呀?!?!?"

有錢太太: "咁你係唔係穩賺先?"

有錢人: "穩就唔穩嫁, 但一定唔會蝕入肉囉; 如果樓價唔升, 唔賣的結果咪一樣, 一鳥在手好過啦, 依家層樓扣埋樓按利息, 差管雜之後, 實際得嗰3厘唔夠咋, 買盈富中移動中電都仲好過啦!!"

有錢太太: "咁又好似係...."

有錢人: "仲有呀, 賣左層樓, 係cash-on hand 百幾萬, 未賣層樓, 係capital value 兩百幾萬, 如果你想個個月有 "糧" 出, 我個個月比返幾千蚊你, 當我租你啲錢去洗嘞!!"

有錢太太: "去死啦你死佬!!!"

好多人都有過上述的爭扎, 有錢人都有過, 但好快就打消了唔賣的念頭, 一來我係一個言而有信的人, 講得出做得到, 就算食左tar 都自己dum心口算了, 信用嘅事重要過錢!!! 二來, 依家買住宅收租唔化算, 一般只有3%左右的租金回報.

所以, 雖然自己都幾鍾意呢個單位, 但都係賣左佢收現金實際啲. 然而, 我仍想提醒各位朋友, 除非閣下真的有需要換樓或轉換居住環境, 例如要搬去第二區等等, 否則, 賣自住樓等跌價再入返就絕對是"沽空"活動 ~~~ 當你"沽左"層樓之後, 你係要租樓住或買樓住的, 咁等同用層樓做short call, 樓價跌而你又搵到心頭好來租或買, 你就有可能賺 (都要睇埋有無樓按/ 稅金之類的因素), 如果樓價/租金不斷升, 你的"權金"就bye bye了... 但你不能cut loss的, 因為人是有住屋需要的...