投資股票的方式

自稱投資者的人 (包括有錢人), 每個人都會有自己一套投資方式, 有錢人會分類如下:

1. 有一些人的方式是人講佢買 (例如財演、"專家"、朋友) ~通常呢啲都係"行後死先" (因為跟風嘛, 所以賺又賺得少, 蝕又蝕得金);

2. 有啲人會睇圖、睇趨勢做買賣, 呢類人贏輸係一半一半 (但會蝕手續費囉), 因為股價嘅嘢, 唔係升就跌嫁啦, 好似阿叔話齋12碼, 一係入一係唔入, 同買大細無差, 賭仔實話自己必勝嫁喎!!

3. 選好"懶人優質股" (或者指數基金) 做月供計畫或者買完就"擺", 慢慢累積財富, 呢類人通常係好保險嘅, 因為大賺就無佢份嫁喇, 但大蝕咩? 一般都無佢份, 講得"懶人優質股", 一定係有晒track record, 有穩定股息的大籃籌居多. 雖然, 呢種方法看似白痴, 但呢種懶人投資法, 有錢人肯定, 成績已經打贏80%以上的人 (主要是上面兩種人).

4. 最後一類, 通常係成績最好的, 前題是: 十分努力做功課, 肯用心去分析自己投資嘅公司做緊乜, 有乜好, 有乜問題及風險, 幾時會有幾多回報比自己, 自己嘅買入價係平? 係唔平唔貴? 定係貴? 定期檢討自己嘅研究以及計算方式. 為自己的"賺錢機會"做好準備. 呢種人, 雖然都有機會蝕錢, 但就一定比上面三種人蝕的機會、時間都少.

頭兩類人我唔多作介紹: 第一個類絕對係"投運"人, 第二類, 如果唔係"投運"人, 就係專業投資公司嘅人 (例如, 基金經理), 都唔係我地杯茶.

如果你自問想投資賺錢, 但又唔想"全情投入", 有錢人介紹你做第三類人, 搵一啲好的公司股票, 買入, 持有, 收息, 再投入, 再收息, 再投入, 呢個方式, 由1930年代, 即價值投資開始被廣泛接受開始, 已經被認知及利用. 絕無花假. 而當中最最最最最簡單, 就係買入指數基金 (e.g. 2800盈富基金), 可知道, 如果你由2000年開始每年年頭都買一次2800, 再將股息再投入, 你已經有超過每年平均10%回報率. 即是總回報約為2.6倍. 對比買樓, 2003年沙士價買淘大, 到依家都係賺3倍咋. 但買樓要做mortgage先有3倍回報, 買2800, 係一年一注進行兼唔洗做mortgage喎 (有錢人唔係推介股票呀)

如果你想成為第4類人, 咁你就要有心理準備全情投入, 最起碼, 你喺頭一段時間必定要, 皆因你要做好多功課, 做好多計算 (雖然都係簡單計算), 同埋要學多好多不同行業方面的知識 (包括會計, 經濟, 甚至科技), 因為你每研究一間公司, 最少都要研究佢做緊嘅行業啦.

有錢人就緊係向住第四類人前進啦, 以今年計, 我睇嘅書係過往嘅多一倍, 由年中到依家,都已經睇左20本書 (唔睇返紀錄都唔知), 即是平均一個月睇3本書, 仲未計重覆再睇某一啲書、公司年報、公司新聞、舊聞... 有錢老婆上網玩facebook, 去淘寶, 上日本網買衫,  我就 "聰明的投資人", "證券分析", "snow-ball", 人地返工搭車訓覺, 我就睇 "索羅斯 xxxx"、"德蕾沙修女的一生", 同事lunch之後吹水, 我就上網睇公司新聞. 當然, 有錢人係有興趣睇書, 研究公司事務先可以咁全情投入. 但回看, 今年, 一定係有錢人自己的投資歷史上最好成績的一年.

唔計樓市增長, 股票市場為有錢人的資金提供左約25%回報, 如果年年係咁, 有錢人就真係勁到升天了. 有錢人期望自己做到15%複利回報就當是成功了.