10年磨一劍, 一年界一刀

投資/ 投機賺錢, 從來都不是交易越多就越賺得錢多, 否則, 大行的超級電腦、程式交易咪天下無敵? 可惜, 買入後放落櫳底, 幾十年拎返出來的"長線投資"又未必可行,觀乎恆指幾十年前的成份股, 到今天也只剩下為數不多的死剩種.

即是, 交易頻頻又死, 買入長揸又死? 買又死唔買又被通脹屈死? 

非也, 其實, 觀乎股市的表現, 每年最少有一次至兩次上落10%-20%, 有錢人講緊已經係大市的一般上落波動. 如果講個股, 波動幅度可能仲大, 就以最近的波動為例子, 大市由年頭高位近24,000多點跌到去依家近21,000, 整整3,000點, 也就是 24,000點的 12.5%, 如果年尾又去返 24,000點, 即是21,000 的14.28%.

無論股市又好, 樓市又好, 甚至經濟都好, 都係波動上落, 我地卻是當中的螻蟻, 不會知道幾時上幾時落, 呢啲事連專家都唔會講得準, 謝國忠博士的下跌研究, 有錢人都不知聽了多少年了, 真係你有你講, 佢有佢升, 但總有一日, 博士一定會講得中的, 因為升到高處無力再上就只有下跌, 跌到低位儲夠實力又會升返.

有錢人唔識占卜, 又唔係神仙, 只覺得息率3.06%的盈富(2800)是平, 息率4.5%的中移動也屬底買, 息率4.0%的中電也很底. 其他內銀一般都有息率6%以上, 如果派息率不跌的話, 買入後等待一段時間, 應該會有不錯的回報. 但幾時會出現呢個回報, 我唔知道也唔識講,  只認為依家大藍籌公司的收入, 盈利一般都沒有理由大跌, 派息也不應該太差, 就算短期股價沒有大升幅, 也可以當收集收息.

當然, 永遠都要留現金在手是十分重要的 ~~~ 做事太盡, 緣份亦必早盡.

因為今次的大跌, 我應該會把更多的錢轉去股票戶口買實股, 因為不少股票開始進入值得買的價格區, 買入後等待收成.