有錢人之所有廣告收入, 將全數捐予慈善團體

2010年12月31日

管好你的錢 - 理性消費

每年的年尾, 都係節日排山倒海咁嚟....聖誕節, 新年, 之後就有農曆新年, 情人節, 對人嚟講就係節日, 但對大部份"荷包"嚟講, 就係受難日....因為節日多, 即係節目多, 節目多, 即係洗錢多。我諗, 大家都有經驗, 一般喺12月所洗嘅錢都會比之前幾個月多, 而已婚人仕就係喺農曆新年月洗錢特別多。

好多人都想做富人, 但富人並唔係大家講做就做, 一定要有一些原因的, 首先, 在用錢方面, 富人係好有節制嘅, 呢個所謂有節制, 唔等於唔肯洗錢, 只不過富人係知道有乜錢要洗, 點樣洗, 洗幾多, 而且要令到富人覺得 "值得". 當然, "值得"呢個形容詞可以好鬼抽象同因人而異嘅, 有啲人覺得花十幾萬買架"掃把佬"揸就值, 但要佢花多三兩舊水由澳門三星酒店升級去全新五星超豪酒店仲加送埋早餐都話唔值 ~ 呢個係性格喜好同價值觀問題, 有錢人無意深究.

有錢人想講嘅係點樣洗, 同洗幾多呢個問題, 因為呢兩樣事情相對就理性好多, 但偏生好多人都唔識得點處理 (包括以前的有錢人).

點樣洗
首先, 我地可以將洗錢分開兩種: 一種稱之為投資性洗錢, 另外一類叫做花費性洗錢, 而當中就可以簡單解釋為:
1. 投資性洗錢: 講得投資, 就一定要有回報, 而呢個回報必須大於支出,咁就可以洗喇; 例如你買層樓收租, 十萬首期, 其餘分三十年還, 每個月連供款雜費要還一萬蚊, 但你可以收到兩萬蚊租, 淨係個個月淨袋一萬喎, 咁首期呢十萬咪叫做 "值得"洗囉;

2. 花費性洗錢: 花費, 其實, 應該叫 "消費性洗錢", 即係"消錢" (燒錢?!), 要嚟開心嘅, 唔洗講理由, 總之錢洗左去做左啲嘢, 令到自己開心左, 或者有另外任何一種好嘅感覺(好好食、刺激、爽, 等等)就得嫁喇, 但係咁喎, 唔好諗住做完之後啲錢會返到嚟, "燒錢"嘛~~~~灰飛煙滅嫁啦!

洗幾多
呢個問題其實都幾吊詭, 亦都有唔少研究講過嫁喇, 不過, 有錢人就覺得, 你應該洗幾多就可以咁樣去諗: 首先, 將你收入減去"必要的消費項目", 即係唔比會死嘅最最最最最基本生活開支 (包括搭車返工食飯、比錢屋企等,), 之後剩餘的就除開二, 咁當中嘅一半就係投資性洗錢, 另一半就係"燒錢"部份.
例子, 有錢人有一萬蚊收入一個月, 每個月搭車返工加食飯同比屋企無左五千, 咁有錢人就有兩千五用嚟"投資", 兩千五用嚟"燒"喇. 而呢個數, 其實可以隨著你嘅"基本生活"改變而改變嫁(就算收入不變)

嚟到呢度, 大家又可以同自己玩個計數遊戲, 計一計你自己呢個12月有無"燒"多過可以"燒"嘅數呀? 如果有, 唔緊要, 係正常嘅, 年尾節日月呀嘛, 但之後幾個月就要'燒"返少啲補返條數囉, 否則, 就會慢慢變成低資產, 甚至負資產嫁喇. 至於往後, 就緊係未雨綢繆, 儲定"額外消費"啦.

"Often people attempt to live their lives backwards; they try to have more things, or more money, in order to do more of what they want, so they will be happier.  The way it actually works is the reverse.  You must first be who you really are, then do what you need to do, in order to have what you want. " -- by Margaret Young

共勉之! 

沒有留言:

發佈留言