加按、槓桿、風險 (二)

上次寫左篇加按、槓桿、風險 (一)之後, 掛住寫其他嘢, 都未有寫埋個待續故事添...

話說有錢人諗緊加按左之後有乜可以做..."60幾萬, 話多唔多, 話少唔少, 拎得出嚟就緊係投資啦, 唔通洗左佢咩? 都要還嫁嘛; "

有錢人左諗右諗, 有幾個方案都諗得過:

(一) 將所有錢拎去做首期買多一層樓: 但係, 得60幾萬買得啲乜樓呢? 如果以3成首期計, 最多都係200萬樓下的樓, 依家200萬, 就算喺屯門元朗呀, 好多時都係得5百零呎咋陰公... 就算收租有8千(邊有可能?!), 即係只有5厘唔夠,方法不可行!!

(二) 將資金投入去股票市場, 買收息股 ~~ 現時股息率超過5厘而市值有50億以上的香港上市公司有17間, 撇除有啲我唔會掂的, 都有10間以上喎, 可以諗. 但當然要考慮風險因素啦;

(三) 買人民幣: 依家港紙跟老美一齊貶值, 所以買人民幣加定期存款有一定升值能力, 有錢人預期, 人民幣一年升厘左右啦, 加上定存,一至兩厘左右... 即是大約5厘, 如果拎返大陸開戶口存錢, 有超過兩厘添嫁喎;

由於上面二號同三號選擇都唔錯, 所以有錢人好有可能會選2+3, 每樣一半, 一來有cash在手, 有咩事都有得救命, 二來可以收股息加搭埋升市順風車.

在有錢人眼中, 今次行動嘅代價係要比樓按利息, 工作在於搵一樣有超過5厘的投資產品 (唔係好難姐下話), 而失敗風險就係要比多借左嗰60幾萬嘅利息 ~ 應該唔多過5厘, 即係唔多$3,000一年囉. 當然啦, 對於每次嘅投資行動:

第一重點係唔好蝕錢, 第二重點係嚴格遵守第一重點!!! 係咁多.

另外, 有朋友忠告有錢人, "呢種行動, 大把人會做啦, 輪唔輪到你賺鴉?! 想發達人人都想, 但唔可以急囉!"

首先, 有錢人係十分感激有呢啲朋友嘅勸告, 有錢人十分相信佢地真係關心有錢人先會咁講, 而因為佢地嘅意見, 有錢人先會一次又一次咁檢驗自己嘅方法所用嘅假設. 然而, 有錢人卻更相信, 要致富, 係所有人都可以有能力做到, 但點解大部份人唔得? 係因為佢地 "唔做"!! 唔係"唔識做"!!

呢個道理, 同"日日運動身體好,男女老幼做得到"一樣, 咁又有幾多香港人堅持個個星期都做運動? 唔知, 但有錢人會. 人人都知投資股票市場要做功課, 計數, 了解所買公司, 而且要睇長線, 唔應該賭博, 咁又有幾多人做到? 唔知, 但有錢人都做到.

所以, 如果你自問願意好似有錢人一樣, 做足功課, 計足風險及預備 (包括心理上及荷包內) contingency plan, 增加你嘅投資槓桿, 擁抱"有益的負債"並不是壞事啊! 共勉之.