市場上的幾類人

市場上有幾類人:


第一類叫"大戶", 佢地嘅其中一種賺錢方法係大手買賣, 是用佢地本身的財力把不同公司的股價舞高弄低 (尤其市值低的公司較容易做), 令到自己能夠低買高賣. 一般人要變成大戶, 幾近無可能, 因為人地的"遊戲"係億億聲的, 我地如果想參與, 一係努力把自己變成基金經理, 一係就中十次以千萬計的六合彩頭獎. 又或者苦心經營做生意之路, 賺到十億八億, 就有機會參與"大戶的遊戲";

第二類叫"點心", 故名思義, 點心就當然比人食嫁啦? 咁食點心嘅就叫做大戶 (或者大鱷)喇. 通常, 做點心的人會係做左點心都唔知, 又或者明知會做點心都去做嘅. 例如買窩輪、"i kill u later"、cds...太多了, 又好似賭波賭馬咁, 你估買家贏多定馬會贏多呢? 不過一樣大把人爭住去"贏"馬會錢. 這一類所謂"投資"其實都係賭錢, 盤口由輪商開,消息同分析都由輪商發, 人地又有錢可以短線發功將股價舞高弄低, 更可以收你手續費, 如果這樣的賭法你都覺都好玩或者認為有得贏, 不如過大海好過了, 起碼一分鐘開一次 - 夠快嘛;

第三類人叫"投資者", 唔係一般電視電台報紙專欄入面說的"投資者", 而係真真正正做功課,好清楚明白自己買緊甚麼, 又預計了自己最有可能得到的回報,以及預計了最差的回報又是如何, 當然, 最重要係: 投資者對自己的預期回報係有百分百信心, 而正確比率亦一定超過百分之八十. 我認為, 懂得"投機"的人都算是"投資者", 因為好的投機, 一定係計好數, 清楚知道自己勝算有多少, 可以贏幾多, 又或者最多比自己輸幾多. 巴菲特在股市上賺的第一筆錢, 都係投機返來的. 不過, 市場上卻有很多不懂投機的人去作投機操作, 然後變成投運的點心...嗚呼哀哉...

有錢人自問未有能力做基金經理, 也賺不到十億八億去做大戶, 但我每次買股,買樓都好有信心, 亦計算清楚回報率, 回報期, 所以, 我認為自己都算是一個投資者, 但從前我也都做過點心, 真是一次已經嫌多了. 對於做緊點心的朋友, 或者準備做點心的朋友...有錢人只可以說: "施主, 回頭是岸".

另外, 有錢人的另一個tips就係, 如果市場上的所有電視電台報紙專欄的"專家"都講緊某一隻股或某一類股份, 恭喜你, 你的研究及買入對象可以少一個了.