股價波動與股票期權

大家買股票, 玩期權都會睇股票波動, 大家好多時都會覺得大籃籌無乜波動唔好玩, 其實咁先剛剛相反, 所謂悶聲發大財就係悶到你死悶到你怕, 但通常呢啲先係發過豬頭的好工具.


下面就係一啲大家都會認識的大籃籌 (主要選擇了銀行金融類別)的即月波動資料以作例子:

圖片內容更正: 講及variation的 % 應該係少於15% (即是 <15%), 並非圖中的 大於15% (>15%)

從上圖可見, 如果以即月波幅15%為測試, 00002 中電擁有最大得勝率 ~ 99.1%, 如果只計算下跌不多於15%的話, 中電根本就係無敵的100%. 而其他公司大部份都係得勝率超高. (15%價外sp 得勝率一般來講係90% 以上)

當然, 有咁高得勝率就自然唔會有太高回報, 以中電15%價外SP為例, 就算月頭賣都可能得嗰 $40左右, 看似無乜肉食, 仲未計洗費... 但係呢啲價通常按金都只係 $400-$500左右. 如果扣埋洗費 (當$30), 實收 $10 一張合約, 即是回報率係 $10/$400 or $500 = 2% - 2.5%. 但根據往續係必勝的, 咁一年就有30%回報, 仲未計複利效果, 咁又係一個唔錯嘅選擇喎.

大佬呀. 有邊種投資可以做到30% 回報一年, 仲係講緊連續咁多年都得喎. (有錢人的例子是2003/01/01 開始至今107個月未有一次失手!!) 如果當年開始以一萬蚊玩起, 直到8年後的今天, 已經玩到8萬, 爽吧!!

實例:
以現價中電 $65.6 (2011/12/20 收市價), 十二月份已過左大半加上有長假期所以不用作例子, 以一月為例子, $60 SP 收$0.18權金, 一張合約即是$90, 平均返一個月大約收 $0.12, 一張合約收$60, $60 SP 都只係價外唔夠8%, 據有錢人的資料 (無post出來), 10% 價外sp 得勝率係 99%, 推論之下 8% 價外得勝率唔差得過90%. 另外10%機會係 ~~ 一係入貨, 一係早少少平倉蝕現金.

不過, 有樣嘢要提一提, 就係上面的例子玩法, 係唔適大家用過千萬嘅 "游資"去玩嘅, 因為股票期權係唔會好似恆指咁樣, 可以無限資金都相似的回報, 因為每一支股票期權成交量同成交額都無可能億億聲上落, 以未平倉合約張數計, 一般由幾千張到幾萬張不等, 如果係我所講嘅價外sp, 就更加少, 好多時都唔會多過3k, 咁就有數得計: 一張幾十蚊至百零蚊, 如果有1000張合約未平倉, 總合約價值先至係幾萬至幾十萬. 你話有無可能大家可以一擲千萬賺佢個零頭? 答案係無可能嘅!! 所以話, 要賺少錢係唔難, 但要賺大錢就唔係呢度喇.

當然, 有股票期權的股票有幾十隻, 每隻用幾十萬玩, 十隻都幾球啦, 無錯! 但就睇你有無時間心機慢慢逐隻股票計數喇 ~~ 天助自助者!

最後都仲要提一提:



有一樣嘢要記住, 股票期權等都是有槓桿作用的衍生工具, 其最大風險在於會於突變市況下對現金流的需求(按金)變大.... 所以, 投機於此不可以用救命錢, 只可以用多餘錢, 而且仲要計好有安全邊際先好參與, 否則, 好容易會車毀人亡....