得勝率奇高, 但回報亦高的投機策略 (二)

之前一篇文章: "得勝率奇高, 但回報亦高的投機策略" 提到一個有90%月份賺到4%回報的股票期權投機方法.

有網友提到, 如果要預留有現金 ($4000)入貨, 回報率就只有 0.5% ($20/$4000), 不是有錢人所講的 4%. 因為我唔會咁做, 所以未有提到呢個問題, 真係唔該晒網友的提醒, 以下是一些保充.

1) 首先, 有錢人唔會咁做, 因為拎來做期權的錢, 不是救命錢, 可以承受得起高少少風險的;

2) 另外, 由於做法本身已經係 "較安全" (有90%得勝率喎) 的, 所以有錢人會選擇用盡資金額度作槓桿;

3) 以ICBC為例子, 過往6年 (2006-2011)都只係出現過6次一個月跌超過15%, 分別係07年1次, 08年3次, 09年1次, 同11年1次, 08年做乜事大家都知 - 金融海嘯, 斷估都好少人會在此情況下仲重本SHORT-PUT掛... 起碼我唔會;

4) 如果一個月跌超過15%之後壯士斷臂的話要輸幾多? 以即月 (2011/12)的現在呢刻 (2011/12/12 15:45), ICBC LC $4.7 的價位是 $0.19 (下圖)

依家距離月尾仲有大約半個月, 如果咁唔好彩, 月頭 以 $0.05 SP左一張 $4.7, 到依家就係蝕$0.14 (即是$140) ~~~ 即是ICBC用左半個月就跌過我地嘅底線嘞.... 平倉吧啦, 下個月又來過, 又或者再買多一SET 有15%股價水位, 又或者停下來睇定啲....總好過強行買入 "等"佢升返轉頭. 因為有得咁嘅跌幅一般都係超波動的時間!!

5) 洗費有影響: 要比聯交所的交易費同佣金就大家都要比, 但如果我地係大戶, 此等洗費根本不是問題, 因為當中最大的"佣金"係股票行收嘅, 大戶自己本身就係收呢份佣那位. 但我地唔同, 每次買賣都要諗過度過, 就以之前的例子, 賺了$50 權金有 $30係洗費, 真係妹仔大過主人婆, 所以有錢人的做法係 ~~~ 一次做多幾張 SP, 把每次的平均洗費降低, 可以降低幾多? 首先睇睇下圖:

    
以呢間股票行為例, 最低佣金$30 (or 0.18%) 即是 $16,667以下之合約金額都係$30, 又即係333張 我地會 SC 的佣金先會超過佢嘅 minimum, 咁大家如果賣多幾張就會降低平均佣金, 回報率會高速提升, 例如一次做10張, 平均佣金就變成 $3, 唔係 $30, 咁回報就變成 $47 而唔係當初的 $20.... 即是9.4% vs 4%, 分別之大...

所以, 有錢人不會考慮預備 $4000 去做一張 按金 $500的 icbc $4.0 sp, 而會選擇做8張 sp....

= = = = = = = = = =

咁, 以有錢人的做法, 平均來講又會係點睇??

一年入面有11個月賺9.4%, 有1個月蝕28%.... 一年之回報為 93.4%,

如果好彩一年無出現過一個月跌15%以上, 回報就會係193% (超高吧!!!)

如果一年有兩次跌15%以上, 回報為 27.3%;
如果一年有三次跌15%以上, 就會蝕 16.2%; (08年試過)

= = = = = = = = = =

呢個做法的心態, 同我之前的自製accumulator 係完全唔同的心態, 自製accumulator的心態係我地本身都已經想買某一支股票或已經擁有佢, 而想在其中賺多少少 "外快" 的態度, 所以一方面會做sc 或 sp, 但同一時間又會準備足夠現金入貨, 或者入夠貨 (full-cover)去賣;

而今次的做法, 根本就係短線以時間搵錢, 所以根本唔會理會邊一支股票, 最重要計算出其股價波幅, 然後根據自己設定 "安全" 價位, 我的例子是15%波幅, 90%得勝率, 4%回報; 但大家可以再安全少少 ~~~~ 例如: 20%波幅, 95%得勝率, 但只有2.5%回報...

因為唔同人的風險承受力不同, 選擇會唔同, 另外就係唔同股票, 其波幅都不同, 跟有錢人的相反玩法就係搵波幅大的股票做 lc or lp, 好處係刀仔据大樹, 唔好處係時間會為你減值...

提一提:
有一樣嘢要記住, 股票期權等都是有槓桿作用的衍生工具, 其最大風險在於會於突變市況下對現金流的需求(按金)變大.... 所以, 投機於此不可以用救命錢, 只可以用多餘錢, 而且仲要計好有安全邊際先好參與, 否則, 好容易會車毀人亡....