買車經驗分享 ~~~ 未完

有錢人其中一個短期目標, 就係要在今年之內, 搵到一架七人車; 所以近日發放消息予不同渠道, 希望能搵到架啱心水的車. 而有錢人心目中都以TOYOTA的車款為首選, 因為在香港TOYOTA的車款二手價一般較硬淨.


有錢人前幾日去睇車, 一見到就好喜歡, 入面無論間隔, 座位, 梳化, 甚至控制都好滿意, 最唔滿意係價錢, 唔係開價開得貴, 而係唔啱有錢人budget. 因為有錢人的係一個死窮鬼, 又要七人車, 又要洗費平.... 供車budget只有三千蚊左右. 即是車價最多都係十二至十四萬左右... 之前講嗰架, 前後供車 $5,000有多, 超過budget七成, 計埋車場及其他洗費無七千都落唔到樓 (貴過我供樓!!!)...幾鍾意都係假, 現實是養唔起.... 唯有放棄

因為今明兩年之內, 有錢人有一個更大的短期目標, 就係要買樓, 其實有錢人已經有心水地方, 價錢大約350萬-400萬, 依家就係等樓價慢慢向下調至有錢人可支付範圍, 又或者有錢人可動用資金升值, 就會出手, 如果因為買車而令到支出大增, 以至買樓無望, 我諗有錢太太唔殺左我, 我都會自殺.

對於有錢人來講, 始終買車是消費品, 買樓是日用品, 而且我好難將唔用嘅車放租, 但我可以好容易把唔住嘅樓放租, 此之所以, 我只肯用不太高的購買力去買車揸了, 如果睇唔啱, 我寧願唔買車了...