股票選擇與股票期權選擇

好多時有錢人跟朋友講起股票同股票期權的事, 都會感到朋友間對期權有一個錯覺, 就係講買得期權都係同 "賭"一樣. 其實我並不否認期權係有 "賭"的成份, 尤其是當你係用買大細的心態 "估"佢升定跌嘅時候, 呢個 "賭"的本質就出晒嚟. 而且, 最令人不安的是, 坊間有太多太多"專家"教大家用期權在短期裡賺大錢了.... 呢啲所謂"賺錢課程" 說到尾就是 "賺你錢課程", 個人認為大家完全唔洗上堂, 就算是買那些所謂 "期權攻略"、"圖表 xx" 的書, 都可以慳返唔洗睇, 如果呢啲嘢係得嘅, 比你, 仲會出書咩?! 

你身邊有無人因為賭可以發達? 馬會門口啲阿叔個個都好努力 "咪"書, "咪"報紙, 賭波賭馬六合彩樣樣精, 但又有幾多個人贏到錢呢? 贏到錢嘅, 大部份都係有能力喺馬會會所開P嗰啲朋友, 佢地的玩法, 係同大眾完全唔同的....

其實買股票同期權要賺錢, 甚至乎做人都係一樣, 力不到不為財, 但又唔係你出半斤力, 次次都收得返8兩回報喎, 有時會多啲有時又會少啲, 但大體上係 "可以預期的". 股票的選擇, 基本上分兩種, 無錯, 做人簡單啲, 分兩種好嘞 ~~~ 

第一種係收息類, 即係買左唔洗理個價, 總之要定期有錢返 (股息), 要選呢類股票其實一啲都唔複雜, 只要你睇下隻股票過往10年 (起碼都要有5年往績), 係唔係年年有息派, 又睇下佢高低潮的時候又係唔係仲係做緊 "人做嘅嘢" ~~ 乜嘢叫"人做嘅嘢"?! 好簡單, 近年香港地區幫匯豐賺大錢, 其他地區望塵莫及, 但炒人就話先炒香港人, 咁咪唔係人囉; 又例如思捷無乜錢, 但又要豪花180億做 "品牌", 呢個又唔係 "人做嘅嘢"囉.... 要搵呢類公司, 唔一定係大藍籌, 好多時中下價股之中有好多家族公司都做得到, 仲會仲得更好, 因為大股東家族成員都要分水, 所以佢地一般唔會出股東太差.  對於呢類股票, 如果大家唔想煩, 仲有最簡單的做法 ~~~ 2800 盈富基金 ~~~ 一定有息派唔怕執, 平均回報可以超過10%; 

買呢類股票有一個心理上的先決條件, 就係唔好望食價, 否則就好大機會失望而回!!

第二種就係成長型, 要買呢個就多嘢做好多喇, 又要睇pe, 又要睇前景, 直頭要理埋佢祖宗18代係乜水, 仲要每半年每一年都睇睇業績,睇睇公司有乜大新聞, 又要計乜計物.... 總之就係 "投資股市做功課"; 要成為成功的股票投資人, 係一種藝術, 又係一種人生智慧, 在股價低潮時可以處之泰然, 在高股價之時又可以隨遇而安 (自問還未能做得到)... 

買呢類股票, 要有蝕晒同坐艇的準備, 更加無可能一買就賺 ---- 有此心態者, 都係投運而已, 成功者, 少則贏3幾倍, 多則是數以10倍計的利錢 ~~~ 遠期的有匯豐, 思捷, 長實; 近期的有中人壽, 騰訊 ~~~ 未來呢?? (有錢人相信 ~~ 1688 阿里巴巴是其中之一)

股票期權又如何呢? (待續)