股票期權的按金變動

之前每次講起期權, 有錢人經常說:

有一樣嘢要記住, 股票期權等都是有槓桿作用的衍生工具, 其最大風險在於會於突變市況下對現金流的需求(按金)變大.... 所以, 投機於此不可以用救命錢, 只可以用多餘錢, 而且仲要計好有安全邊際先好參與, 否則, 好容易會車毀人亡....




今天有錢人就是想用現實數字去說明 "按金"可以點玩死我地:


今次我用的例子是 941中移動, 因為貪佢夠"廢", 股價長期波動不大. (我自己都有做中移動的股票期權, 就係貪佢夠廢)


上個月尾, 中移動股價 $75 左右, 當時2月 SC $80行使價的按金是大約是 $1500, 但今個月頭, 股價曾經升上 $77 樓上, 當時同一款合約, 按金就由 $1500 變成 $2400 ~~~~ 增加6成; 一張合約相差 $900, 10張就是 $9000大元, 還未計及期權的變化可能有浮虧呢...


在期權戶口內的錢, 我不會放太多的"多餘錢", 通常我只會留有比按金多10%的資金在戶口內以仍緩衝而已; 但一踏入2012, 中移動股價就升破 $77了, 就算在權金沒有蝕的情況下, 戶口仍然唔夠錢做按金.... 所以證券行打比有錢人了...內容是:


證券行: 有錢人先生, 你戶口的資金有機會不足, 可能要補倉喎.
有錢人: 係牙, 差幾多呀?
證券行: 依家仲夠嘅, 但係做期權隻中移動今個月升得好好, 有機會再升的話就唔夠喇.
有錢人: 咁即係依家仲未洗補按金住先啦.
證券行: 係呀, 但請你留意市況啦, 如果唔夠資金或現貨喺戶口, 我地有機會幫你"斬倉"嫁.
有錢人: 好, 如果佢真係升過$80, 我平緊部份倉都得嫁嘛?
證券行: 當然可以啦.
有錢人: 咁我會睇住嫁嘞 (但其實我唔會有任何動作, 也不打算有任何動作)


當然, 到依家股價都無曾經升超過$80, 有錢人繼續用時間幫自己賺錢; 




如果要有更好的"安全邊際", 或者說, 不讓自己泥足深陷, 有以下幾種做法:
("得勝率奇高, 但回報亦高的投機策略(二)" 提過)

1. 賣嘢就一對對咁賣, 唔好賣單邊: 例如說, 做 $80 SC, 就做返一SET $70 SP, 咁樣, 就算佢升得勁, $80 SC要加按金, 但同時 $70 SP就會減按金, 一來一回, 慳返唔少按金. ;


2. 如果股價真係升到超過行使價, 不計成本地平倉, 然後再做返比更高行使價的SC, 咁一來可以減少按金需求, 同時用返一個有更大緩衝的 SC賺權金,幫補已到價的SC的虧損; 如果股價真你升到你唔信, 就新一SET都唔洗做, 離開下, 散下心吧;


3. 適當地利用遠期: 呢個方法只絕對只適用於 "不動明王"股, 因為遠期, 所以同一行使價都有較高權金, 也因此期緩衝時間 (對買家賣家都一樣) 都較長; (有機會講下可以點用得著);


= = = = = = = 
我的期權倉, 由開倉至今, 暫時風平浪靜, 至今賺了3成; 繼續做自己的期權白老鼠.