廢股/ 點穴股的賺錢方法

好多人買賣股票, 看重的就是其股息以及股價升值, 但是在過往的幾個年頭, 大部份的股票都係浮浮沉沉, 由其是大家熟悉的 2628中人壽, 941 中移動, 1398 工行...呢類型已經大大隻又好似無乜增長的股票, 一般都被所謂的 "投資者"拋棄, 也唱衰了十萬九千次了。


但有錢人就是鍾意包頂頸, 逆思為地去諗點解當大家話呢啲係廢股的同時, 又會有個別投資者會入市買嫁呢? 同埋, 我又想去諗下, 點樣先可以財息兼收呢?

就以941 中移動為例子:

08年金融海嘯之後就一直徘徊 $70 - $80之間, 更被稱為點穴股, 但其間年年股息增加 (約5%), 即是股息由08年的3點幾%, 去到依家的4點幾%, 股息收左十二三%...  不太高回報吧;

但加埋股票期權的對沖的話呢?? 一般來講, 以藍籌股價一個月上升15%的機會係少於10% (一般5%-8%), 如果股票在手做FULL COVER係可以唔洗比按金的... 即是說, 每一手股票可以做一SET "免按金" SHORT-CALL, 如果月頭做即月15%價外CALL, 權金大約收 $0.2 - $0.3/ 每股, 一手就收 $100-$150 不等 (視乎市場波動情況);  平均每個月就是0.3% - 0.4%, 一年下來就是 4%-5%, 三年就是12% - 15%; (如果唔係FULL-COVER, 做HALF-COVER, 回報倍升, 如此頖推)

因為我地只做SHORT-CALL, 也不理佢會唔會跌到爆, 只要唔好升到爆就得嘞;

事後孔明地去睇返, 中移動真係一隻 "點穴股", 從來都無令人失望 ~~ 幾年間一直都只係在 $70 -$80之間升升跌跌 ~~~~ 就係咁, 它 "幫"好多人穩定地賺到幾十%回報 (雖然佢股價不變); 所以說它廢, 我就覺得佢 "廢得好" ~~ 起碼, 佢一定唔會執; 第二, 佢一定有派息;

有不同意的人可能會覺得, 好似2628 中人壽咁, 個股價由年頭跌到落年尾 (無左3成), 根本就係廢股一隻, 投資價值極低喎, 但大家要明白, 股價升值係要你賣出了才真正落袋的, 但權金收入同股息收入就係現金流入.

如果一間公司唔執, 股價又唔升, 但股息年年升, 其實其投資價值是不停上升的.

其他的廢股, 大家都可以用同樣的思為計算一下, 或許會給大家一個驚喜 (或驚嚇)都唔定.