青年人買唔起樓? 我唔信!!!

近期睇過唔少節目講樓市, 有不少年青人話無錢買樓/ 買唔起樓, 有錢人好奇怪:
1) 點解個個 "未置業"的case都話比三成首期比唔起? 一成首期唔得嫁咩? 雖然要比樓按保險, 但入場費平嘛...
有錢人的經驗: 四年前有錢人就係做95按揭開始, 首期連雜費十萬唔洗, 做廿五年按, 每月供七千多少少. 雖然當時"有錢女朋友" (即係依家"有錢太太")反對, 但有錢人當時"仙都唔仙", 只可以極力要求以此方法上車, 輕輕鬆鬆供款, 都係呢兩個原因: 1) 上車費平; 2) 供款舒服. 因為自知係自住, 只要我乖乖供款, 銀行係唔會無厘頭迫我還錢兼收樓的;

2) 結婚要洗好多錢, 用晒儲蓄...要洗錢結婚就買唔到樓
有錢人的經驗:  結婚本身唔係要洗好多錢嫁咋, 要洗錢係因為要"風風光光", "一生人一次嘛, 緊係要xxx, xxxx xxx ....(下刪一萬字). 有錢人兩年前結婚, 因為無錢, 無擺酒, 無影結婚相, 淨係比左"禮金" "有錢外母" , 之後就結婚以及跟有錢太太遠走高飛 (渡蜜月). 我明白, "一生人一次"的道理, 但是, 在結婚這個墳墓前, 是否一定要 "風光大葬" 先算結過婚? 結婚所用的錢是"消費"啊, 要豪洗定慳洗, 自己選擇吧;

3) 要我住入去新界? 好遠喎, 出入好唔方便...
有錢人的經驗: 有錢人住左新界幾十年, 由以前過海兩個鐘到依家過海車程半個鐘, 你話香港仔過中環中心快定元朗去中環中心快? 我就話元朗喇 ~ 尤其繁忙時間. 淨係一條香港仔隧道都半個鐘啦, 元朗968出到上環信德喇. 新界係遠, 但公路鐵路已發展, 想住返本區, 係因為 neigberhood 以及sense of belonging;

4) 買樓住, 又想保值, 又怕被加息...
有錢人的經驗: 買樓用嚟住, 就是心頭好, 得到的是住入去的 "sense of satisfaction", 保唔保值不是第一考慮, 你"willing" 又"able"去買就得喇, "able" 嘅意思唔係淨係比首期, 而係日後的供款加有關差餉雜費, 買 -就要預埋有機會加息. 當年有錢人買第一層樓, 外面利息做緊5%有多, 我就預佢會加多兩厘 (即係大約要供多兩千銀做緩衝), 以此為基礎, 有錢人當時仙都唔仙, 唔做廿五年按點掂呀 ~~ 咪拉長個供款期囉. 利息比多左, 但最緊要係 "安全上車, 坐得穩陣、舒服、安心";  買樓有兩個功能: 但我們必須清楚 :買樓自住 vs 買樓投資

5) 只望過去, 不問未來...
有錢人的經驗: 人總喜歡只望過去的好, 今天的差, 不會展望明天的更好 (或更差), 這性格又是另一大拐角令人生 "變差". 好多人唔係無睇過樓, 只是當日見個價錢感覺貴, 唔買, 到今時今日 "睇"返個價錢就吔吔聲呻笨; 如果情況係180度倒轉, 佢地就會嘩嘩聲叫好彩無入貨... 但有錢人相信, 最終, 佢地都會係無物業在手, 直到佢地唔買唔得. 其實, 人生是要自己掌握的, 過去、歷史係要嚟 "睇"嘅, 我們需要為 "預計"的未來做準備, 否則, 我們就是把自己的人生 "投運" .

6) "我唔想借咁多錢, 我唔鍾意欠銀行咁多錢, 感覺好唔穩陣"...
有錢人的經驗: 欠銀行錢唔係問題, 最重要是知道欠來為甚麼. 如富爸爸窮爸爸提過, 欠債係有分好債務同壞債務; 好債務是幫你搵錢的, 壞債務是讓你洗錢的. 只要能夠分清借錢買樓是消費還是投資, 清楚自己的還款能力是否足夠, "感覺好唔穩陣" 都只是感覺而已.
有錢人當年買樓, 預期未來的價值會上升, 所以, 就算做95按揭欠銀行"巨款"(當時對有錢人來講, 百來萬已經係巨款了)都唔怕, 雖然層樓係自住 (消費性), 但深感有買樓需要加上升值預期, 所以沒有 "擔心" 亦不怕欠債.

現今未置業者, 時常"希望"樓價下跌/ 平穩, 但問其"預期"何時下跌又或是何謂平穩卻全無概念, 此乃另外一種 "投運". 請自我反省!!